ബെംഗളൂരു: സംസ്ഥാനത്ത് അശ്രദ്ധമായും അശാസ്ത്രീയമായും വാഹനമോടിക്കുന്നവർക്കെതിരെ കർശന നടപടിയെടുക്കാൻ കർണാടക സർക്കാർ ഒരുങ്ങുന്നു. ഗതാഗതക്കുരുക്ക് ഒഴിവാക്കാനെന്ന പേരിൽ ഫുട്പാത്തുകളിലൂടെ കാറുകളും ഇരുചക്ര വാഹനങ്ങളും ഓടിക്കുന്നവർക്ക് കനത്ത പിഴ ചുമത്താനാണ് സർക്കാരിന്റെ നീക്കം. ഇതിന്റെ ഭാഗമായി നിലവിലുള്ള 500 രൂപ പിഴ 5,000 രൂപയായി ഉയർത്താൻ പദ്ധതിയിടുന്നു.
ലംഘനം തുടർന്നാൽ 10,000 രൂപ പിഴ; ഗതാഗത വകുപ്പിന്റെ നിർദേശം
നിർദ്ദിഷ്ട നിയമാവലി അനുസരിച്ച് ഫുട്പാത്തിലൂടെ വാഹനമോടിക്കുന്നതിലെ ആദ്യ ലംഘനത്തിന് 5,000 രൂപയും, ഇത് ആവർത്തിച്ചാൽ 10,000 രൂപയും പിഴ ഈടാക്കാനാണ് നിർദേശമുള്ളത്. ഇതുസംബന്ധിച്ച് ഗതാഗത വകുപ്പ് സർക്കാരിന് സമർപ്പിച്ച ശുപാർശയിൽ അന്തിമ തീരുമാനം കൈക്കൊള്ളാനിരിക്കുന്നതേയുള്ളൂ. റോഡുകളിൽ ഗതാഗതക്കുരുക്ക് രൂക്ഷമാകുമ്പോൾ യാത്രക്കാർ ഫുട്പാത്തുകൾ പാതയായി ഉപയോഗിക്കുന്നത് പൂർണ്ണമായും തടയുകയാണ് ഈ നടപടിയിലൂടെ ലക്ഷ്യമിടുന്നത്.
ഫുട്പാത്തുകൾ ഒഴിപ്പിച്ചിട്ടും തടസ്സമൊഴിയാതെ കാൽനടയാത്ര
നേരത്തെ സുപ്രീം കോടതിയുടെ നിർദ്ദേശത്തെ തുടർന്ന് ബെംഗളൂരുവിലെ പല ഫുട്പാത്തുകളിലെയും അനധികൃത കയ്യേറ്റങ്ങൾ അധികൃതർ ഒഴിപ്പിച്ചിരുന്നു. എന്നാൽ കയ്യേറ്റങ്ങൾ ഒഴിപ്പിച്ച് വൃത്തിയാക്കിയ ഫുട്പാത്തുകളിലൂടെ വാഹനമോടിക്കുന്ന പ്രവണത വർധിച്ചതോടെയാണ് ബലപ്രയോഗത്തിലൂടെയും കനത്ത പിഴയിലൂടെയും ഇവരെ തടയാൻ സർക്കാർ തീരുമാനിച്ചത്.
മറ്റു നിയമലംഘനങ്ങൾക്കും കനത്ത ശിക്ഷ
ഫുട്പാത്തുകളിലൂടെയുള്ള യാത്രയ്ക്ക് മാത്രമല്ല, മറ്റ് പ്രധാന ഗതാഗത നിയമലംഘനങ്ങൾക്കും പിഴ തുക വലിയ തോതിൽ വർധിപ്പിക്കുന്നതിനെക്കുറിച്ച് സർക്കാർ ആലോചിക്കുന്നുണ്ട്. ഫുട്പാത്തുകളിലെ അനധികൃത പാർക്കിംഗ്, വൺവേകളിൽ എതിർദിശയിലൂടെയുള്ള വാഹനമോടിക്കൽ, നോ പാർക്കിംഗ് സോണുകളിലെ പാർക്കിംഗ്, ട്രാഫിക് സിഗ്നൽ ലംഘനങ്ങൾ എന്നിവയ്ക്കും വരും ദിവസങ്ങളിൽ പിഴ കുത്തനെ ഉയർത്തിയേക്കും.
ബെംഗളൂരുവാർത്തയുടെ ആൻഡ്രോയ്ഡ് ആപ്ലിക്കേഷൻ ഇപ്പോൾ ഗൂഗിൾ പ്ലേസ്റ്റോറിൽ ലഭ്യമാണ്, പോർട്ടലിൽ പ്രസിദ്ധീകരിക്കുന്ന വാർത്തകൾ വേഗത്തിൽ അറിയാൻ മൊബൈൽ ആപ്പ് ഇൻസ്റ്റാൾ ചെയ്യുക. If you cannot read Malayalam,Download BengaluruVartha Android app from Google play store and Click On the News Reader Button. [masterslider id="10"]
